كاين فئة كبيرة من المجتمع الجزائري و هي الفئة الأكثر ، ماهي سامعة بوالو ، عايشين كيما قالو ، ياكلو كيما قالو يشربو كيما قالو ، يشروها غالية او رخيسة كيما قالو ، و اللي يقولوه فالتلفزيون او شافوه فمواقع التواصل الإجتماعي معناه انه خبر رسمي ، و يقدر هذا الشخص يجزم و يقسم بأنه على حق ، و قادر يربحلك العيب عادي.
هذه الفئة انا نسميها #فئة_رخوية قادرة على التأقلم مع كل الظروف ، وهم الفئة اللي يخلصو مليون و نص و يصرفوا ثلاثة ملاين.
وهم الفئة اللي يأمنو بلي لاكتوفيبر دوا مهوش مكمل غذائي و يأمنو أيضا أنه الحليب مكانش فالجزاىر لانه سويسرا مهيش تبيع فالابقار تاعها لانه اصبحت مطلوبة باش تكفي مصانع الشكولاطة.
هذه الفئة الرخوية قدرت تنشر فكرها في فئات اكبر و سيطرت على مفاصل المجتمع البسيط ، وهوما اللي يقولو بانه القانون واعر ، بصح متخافش منه اذا مشافوكش المهم ما تتحكمش.
هذه الفئة قبلت الوضعية الحالية و ترفض انها تتطور و ترفض انها تهيأ نفسها للخروج من هذه الضائقة النفسية ، لانهم يشوفو الواقع الجزائري حسب تفكيرهم هم فقط.
هذه الفئة ما تقدر تحاورهم ما تقدر تناقشهم لانهم يفهمو في كل شيء و يعرفو كل شيء و اا حكيت على خصية يأمنو بلي هي شخصية مهمة يليق اخي تسكت بكل بساطة و تقولهم سمحولي راني غلطت كي حكيت معاكم.
هذه الفئة بالنسبة الي انا لازم يكسر حاجز خوفها و يجب قبل كل شيء كسر جدران ثقتها الغالطة في نفسها و يجب الدخول اليهم من خلال ما يحبون ، لذلك فتواجدي في هذه الصفحة هو واحدة من هذه العمليات الدقيقة في علم الاجتماع المتعلقة ببناء مجتمع وفق فكرة ووفق ارادة منفردة بدون ارادة القطيع.
"برك باش تفهموني بانكم غالطين لازم تفهموا بلي " هناك سياسة في كل شيء ، فالقضاء فالتجارة فالاقتصاد فالعمل فالتربية فالمسجد فالرياضة ،،، الخ وفي كل مجال كاين سياسة و كون متكونش هذي السياسة ميكونش القطاع عنده هوية ، و اذا مكانش هوية مكانش ذيك الحاجة ، انا نقولهم بلي اذا مدخلتوش في عالم المعرفة لازم لازم تدخلو على الاقل في عالم يقدر يفرق بين الصحيح و الغالط"