صيغة الإدخار للسكن العائلي للجيش الوطني الشعبي

 لسلام عليكم  للتوضيح صيغة الادخار باه متزيدوش تسقسيوا ، لانو الناس تخرط بزاف و هذا الموضوع منشور في مجلة الجيش ، ماشي بهذا التفصيل بصح حنا فصلناه جيدا.

علابالي كاين صحابي هنا بزاف  يعرفوني و يعرفو واش راني نقول بصح حبيت نقولكم على الصيغة هذي تاع الادخار واش معناتها كيفاش تستفاد منها و شكون يستفاد.

هذه الصيغة الهدف تاعها ، ينقسو الضغط على الادارات العمومية بالرقمنة ، و يستثمروا دراهم العسكر و ينقصوا بزاف من المشاكل الاجتماعية  و ينحيو مشكل تاع العسكري اللي ما يعرفش يخبي دراهم  و يخلوك تخدم مرتاح  كي شغل اللي ما يعرفش يدير لافونير يعاونوك فيه.

شكون يقدر يسجل وواش هو الملف؟؟

كل العسكريين العاملين (actif) يقدرو يسجلو فيها

تعمر زوج نماذج وحدة بالعربية ووحدة بالفرنسية 

 شهادة اثبات بلي قيد الخدمة (راكم تعرفوها) 

 تدفع الملف تاعك وين راك خدام و تنتظر.

 كيفاش يصرا للملف تاعك ؟؟

الصوصيال فالجهوي كي يلحقهم الدوسي تاعك يديرو عليك تحقيق اداري بسيط جدا 

التحقيق بلي مراكش مستفيد من سكن بملك او قطعة ارض ملكك من مديرية مسح الاراضي و المحافضة العقارية.

 التحقيق بلي مراكش مستفيد من قبل من القروض تاع السكن و الاعانات ، من عند ج و ش.

 اذا خرجو في زوج سلبيين يديرولك امر باقتطاع من الراتب الشهري و يبعثوه لمركز الدفع.

 يبداو ينحولك من الشهرية حساب تاع 100 مليون عشر سنوات اي معناه 8.333.40 دج و يحطوك في قائمة.

 كي تخرج وزارة السكن كوطة تاع LPA لكل ولاية ، راه كاين اتفاقية مع وزارة السكن ووزارة الدفاع الوطني باش من كل كوطة تخلي 20% اي بمجموع  5000 سكن سنويا عبر القطر الوطني لوزارة الدفاع بهذي الصيغة (LPA) بالنسبة ل ض ص و ال. ض .ب.ا.ط يسجلولهم ف LPP

مثلا استفادت ولاية الجزائر من 2000 سكن بالصيغتين , تخلي لوزارة الدفاع 400 سكن للجيش.

وزارة الدفاع كي تلحقها 400 مبرمجة كمثال، تسجل لاول 400 عسكري اللي دفعوا ملفاتهم و طلبوا سكن فالعاصمة و دارولهم تحقيق و خرجو سلبيين حسب ارقام ملفات الدفع و الباقي ينتظرو.

اذا كنت كملت 10 سنين تاعك و هوما ينحولك هاي تجي ساهلة كيفاش يمولولك سكن تاعك.

هوما يدفعو الاقساط 20% و 15% %35 و 25% و 5% من 100 مليون لي اقتطعوهالك حسب الرتبة تاع العسكري بالنسبة مثلا لاي ض ص عامل 

يزيدوك 120 مليون كاعانة 

 يزيدو  يكملولك قيمة السكن ب 100 اخرى كريدي ،

 اضافة لـ 70 مليون تاع CNL  او 40 حسب الراتب تاعك وزوجتك ، هذاك لكريدي يبداو يقتطعوه نهار يخرجلك قرار الاستفادة من السكن على مدة حسب الجدول اللي داروه. و اني حطيتو لتحت فالصورة.

قواعد مهمة 

 مجموع ادخارك هو 100 

  تدي 70 او 40 تاع صندوق السكن حسب الخلصة تاعك

120 مليون اعانة.

الكريدي  

وحدد مبلغ القرض الخاص بالسكن العائلي على النحو التالي:

الضباط العاملون والمستخدمين المدنيون الشبيهين خارج الصنف يستفيدون من قرض يقدر بـ2.000.000 دج يتم تسديده في أجل 144 شهر، باقتطاع شهري قدره 10.888.88 دج بدون فوائد.

ضباط الصف والمستخدمين المدنيين للفئات من 11 و17 فإن مبلغ القرض يقدر بـ1.000.000 دج يتم تسديده في أجل 144 شهر باقتطاع شهري يقدر بـ6944.44 دج دون فائدة.

الضباط العاملين والمستخدمين المدنيين الشبيهين خارج الصنف تقدر الإعانة بـ100 مليون سنتيم.

ضباط الصف والمستخدمون المدنيون للفئات سيستفيد من 11 و17 من إعانات تقدر بـ120 مليون سنتيم.

الناس اللي سجلت و هي خدامة كي تخرج التقاعد و هوما ينحولهم ديجا ، يبقاو ينحيولهم نفس المبلغ و كانك خدام. و اذا ما بداوش ينحولك وقت خدمتك و دوسيك فات ، يقدرو يبداو ينحيولك و انت متقاعد 

 الناس اللي تقعد في قائمة الانتظار و ما يلحقهاش الدور ولا الكوطة مكانش ، يقعدو في الانتظار حتى ينوب ربي .

مثلا فوت مدة و هوما ينحولك بصح كرهت معطاوكش دار و ما بان عليك والو ، تقدر تبطل الادخار تاعك اذا تجاوزت مدة 5 سنين و هوما يقتطعولك و يدفعولك المبلغ اللي اقتعوهلك فالحساب الجاري تاعك.

 اذا سجلولك ما يخبروكش رانا سجلنالك ، و ما يقولولكش راك استفدت حتى نهار يخرجلك قرار الاستفادة ، و كاين اللي مدولهم وصل دفع الملف فيه رقم تسلسلي تاع الملف.

 الناس اللي طلبت التسجيل في ولايات فيهم كوطات تاع سكن ، ممكن يستفادو عن قريب خاصة العاصمة وهران و تلمسان و قسنطينة و سطيف ، اما الولايات الاخرى اللي متجيهمش كوطات بزاف تاع lpa  و اذا جات يمدو قليل ربي معاكم.

صيغة استثمرت فيها (و د) دراهم العسكر و تنحي غبينة على الناس اللي ما تعرفش تخبي دراهمها.

هكا راك فهمت كلشي طاڨي واحد صاحبك يعرف و انشرها ولك اجران.

 ما تسقسينيش تقولي بداو يقتطعولي و انا عندي عقار ، ما علاباليش واش يديرولكم.

 ما تسقسينيش تقولي مزال ما بداوش ينحيولي وكتاه يبداو ، معلاباليش.

 ما تسقسينيش تقولي سجلت ف lpa  و سجلت فالادخار كيفاه ، ما علاباليش.

 اي حاجة ، منين تخدمو يخبروكم كلشي .